عقبال املتكم ونهالتكم ،ادونى جائزة تقديرية كبيرة من الدولة تقديرا لجهودى فى زرع المكرونة الاسباجتى كاحسن واحد بيزرع مكرونة بالصلصة ،ومش كده وبس ده كمان لما تيجى تحصدها تلاقيها مستوية عشان كنت بارويها بمية مغلية .وادونى اربع تلاف جنيه لهذا المشروع العملاق عشان اكبره واصدر مكرونة بالصلصة لايطاليا.وفى البيت لقيت العيال عاملين حفلة ومعلقين بلاليص فى السقف وموزعين مش على اهل الكفر كلاته احتفالا بهذا المشروع العملاق.وقالو لى "يا باابا يا عظيم يالى زرعت المكرونة فى البلكونة وكانت مستوية فى البلاد الاستوائية ،احنا عاوزين كمبيوتر عشان ننشرلك اختراعك ده على النت بمشابك عشان يجف "
المهم اخدت القرشنات ورحت جبت الكمبيوتر والسى بورد والراجل جابلى الفارة ومعاها كيس سم ،والعيال فرحوا جدا وشالوا الجائزة التقديرية وشغلو الكمبيوتر وقعدوا قدامه وبقيت عطيه تخبز العيش قدام الكمبيوتر وتنظف الخضار قدام الكمبيوتر ،وتنشرالغسيل قدام الكمبيوتر ،والعيال ما بقوش يذاكرو خالص وبقوا يلعبو مع الفارة وناسين ابوهم وامهم اللى شايلين همهم .
وبقى محروس وذكيه ما ليهم غير الانطوائية ،قاعدين ساكتين عينهم طلعت بره وما بقاش فى مسرة .بقيت انادى على محروس يقولى:
_ادخل ريح شوية على بال ما اخلص اللعبة دى .........واقول لذكية تعالى انا عايزك فى موضوع ،تقولى :
الemail بتاعى مرفوع.
ا
المهم قلت اقعد شوية معاهم اتعلم التكنولوجيا الحديثة ،لاقيت الواد محروس بيكلم بنت عمرها 67سنة فى مدغشقر وبيقولى :
_يا بابا انا بحب البت الشيكولاته "بطريشيا"
قلت له:وماله يا حبيبى انشاء الله هجيبلك اتنين ،واحدة تلبسها والتانية تشيلها فى جهازك.
_هو ايه ده يا بابا؟
_مش انت يا حبيبى بتكلمنى عن الجزمة السودا اللى انت عاوزها من مدغشقر
_يا بابا انت نظرك ضعف ما ينفعش تقعد قدام الكمبيوتر ،قوم اقعد على الكرسى عشان الكمبيوتر ما يزعلش
ومن ساعة ما الكمبيوتر دخل الكفر ما حدش بقى بيكلم حد، المهم يقعدوا على النت ويكلمو الواد والبت.
صررررخت باعلى صوتى وقلت:
لا....لازم نعرف واجبتنا ،كل واحد بيطالب بحقوقه بس مش بيفكر فى واجباته تجاه اسرته واتجاه نفسه والاهم تجاه علاقته بربنا .يا ولادى التقدم جميل والعلم نور وكهرباء كمان وربنا هيحاسبنا ان كان ممكن نعرف وش عايزين ولكن..........
اولا:مينفعش نهمل حياتنا الروحية من غير صلاة
ثانيا:حياتنا عبارة عن لحظات لازم نستفيد من كل لحظة مش علشانا بس ولكن علشان نفيد المحيطين بينا ،مثل المرضى والمساكين واللى مفيش حد يسال عليهم
ثالثا:ضيعتو اجتماعتنا مع بعض حول الانجيل او علشان نشوف مشاكل البيت وترتيب امور الاسرة وكل واحد بقى سلبى .
رابعا:ما فيش حاجة تتسلط عليكم"...لا يتسلط على شى"(كو12:6) وانت اصبحتو مدمنين للكمبيوتر ،لازم تنظموا وقتكم فى الصلاة والمذاكرة والكمبيوتر.
خامسا :قولتولى هاتحطوا اختراع زراعة المكرونة بالصلصة على النت ونسيتو.....
كان معكم مخيمر وديع صاحب اختراع زراعة المكرونة،بيودعكم باسرة كلها اختراعات والتزمات من غير اهمالات...
الجمعة أغسطس 08, 2008 6:07 pm
